ސެމްސަންގުން އަލަށް ތައާރަފުކުރާ Galaxy Z Fold8 އަކީ ފޯލްޑަބަލް ފޯނުތަކުގެ މާކެޓަށް ބޮޑު ބަދަލެއް ގެނައުމަށް ފަރުމާކޮށްފައިވާ ފޯނެކެވެ. މި ފޯނު ފަރުމާކޮށްފައިވަނީ ފްލިޕް އަދި އާދައިގެ ފޯލްޑް ފޯނުތަކުގެ ސައިޒާ ދެމެދުގެ މިންގަނޑަކަށެވެ. މި ސީރީޒްގެ އެންމެ މަތީ މޮޑެލްގެ ގޮތުގައި Z Fold8 Ultra ފެނިގެންދާނެ ކަމަށް ސެމްސަންގުން ބުނެއެވެ.
ޑިސްޕްލޭ އަދި ޑިޒައިން
މި ފޯނުގެ ބޭރުގައި 5.5 އިންޗީގެ ކަވަރ ޑިސްޕްލޭއެއް އިންނައިރު، ފޯނު ހުޅުވާލުމުން 7.6 އިންޗީގެ ބޮޑު ސްކްރީނެއް ލިބެއެވެ. ބޭރު ސްކްރީނަކީ ވީޑިއޯ ބެލުމަށާއި ގޭމް ކުޅުމަށް ފަސޭހަ 16:10 އެސްޕެކްޓް ރޭޝިއޯ ހިމެނޭ ސްކްރީނެކެވެ. އެތެރޭގެ ސްކްރީނަކީ ފޮތް ކިޔުމަށާއި ވެބްސައިޓްތައް ބެލުމަށް އެކަށޭނަ 4:3 ރޭޝިއޯގެ ސްކްރީނެކެވެ. ދެ ސްކްރީނަކީވެސް 120Hz ރިފްރެޝް ރޭޓް ސަޕޯޓްކުރާ LTPO OLED ޕެނަލްތަކެކެވެ.
ޕްރޮސެސަރާއި ބެޓެރީގެ ބާރުގަދަކަން
ފޯނުގެ އެތެރޭގެ ބާރުގަދަކުރުމަށް ބޭނުންކޮށްފައިވަނީ Snapdragon 8 Elite Gen 5 ޕްރޮސެސަރެވެ. މިއީ 12GB ނުވަތަ 16GB ގެ ރޭމްއާއެކު ލިބޭނެ ފޯނެކެވެ. މި ފޯނަކީ ސިލިކަން-ކާބަން ބެޓެރީ ޓެކްނޮލޮޖީ ބޭނުންކޮށްގެން ސެމްސަންގުން ނެރުނު ފުރަތަމަ ފޯނެވެ. 5,000mAh ގެ ބެޓެރީއާއެކު، 45W ގެ ފާސްޓް ޗާޖިންގް ބޭނުންކޮށްގެން 30 މިނެޓު ތެރޭގައި %67 ޗާޖުކޮށްލެވޭއިރު، ވަޔަރލެސް ޗާޖިންގް ވެސް ވަނީ 20W އަށް މަތިކޮށްފައެވެ.
ކެމެރާ އަދި އިތުރު ފީޗާތައް
ކެމެރާ ސިސްޓަމަށް ބަލާއިރު، މައި ކެމެރާއެއްގެ ގޮތުގައި OIS އެކުލެވޭ 50MP ސެންސަރެއް ހިމެނެއެވެ. މީގެ އިތުރުން 50MP ގެ އަލްޓްރާ-ވައިޑް ކެމެރާއަކާއި، ސެލްފީ ނެގުމަށް ދެ 10MP ކެމެރާ ހިމެނެއެވެ. ފޯނުގެ ވަރުގަދަކަން އިތުރުކުރުމަށް ”Flex Titanium“ ޓެކްނޮލޮޖީ ބޭނުންކޮށްފައިވާއިރު، މީގެ ސަބަބުން ސްކްރީން ރައްކާތެރިކޮށްދީ، ފޯނު ފަތްޖަހާ ތަނުގައި އުފެދޭ ރޫ ކުޑަކޮށްދެއެވެ.
ލިބެން ހުންނާނެ ކުލަތަކާއި ސޮފްޓްވެއަރ
މި ފޯނު މަސައްކަތްކުރާނީ އެންޑްރޮއިޑް 17 އަދި One UI 9 ގައެވެ. ފޯނު ލިބެން ހުންނާނީ ގްރެފައިޓް، ކްރީމް، ލެވެންޑާ އަދި ސެމްސަންގް ވެބްސައިޓުން އެކަނި ލިބޭނެ ޕިސްޓާޗިއޯ ކުލައިގައެވެ. IP48 ރޭޓިންގްއާއެކު ފެނާއި ހިރަފުހުން ރައްކާތެރިކަން ލިބިގެންވާ މި ފޯނަކީ ކުރީގެ މޮޑެލްތަކަށްވުރެ ތުނިކޮށް ފަރުމާކޮށްފައިވާ ފޯނެކެވެ.
